जिल्ह्यामध्ये कोरोना विषाणूचा प्रसार होऊ नये,यासाठी खबरदारी म्हणून फक्त जीवनावश्यक व अत्यावश्यक सेवाच सुरू असतील. यामध्ये शॉपिंग मॉल, दुकाने व आस्थापना मधील फक्त जीवनावश्यक वस्तू, किराणा सामान, दूध, भाजीपाला, फळे इत्यादी सेवा वगळून सर्व दुकाने व आस्थापने कायमस्वरूपी पुढील आदेशापर्यंत बंद राहतील. चिकन व मटन शॉप सुरू आहे. तसेच हॉटेल्स, रेस्टॉरंट, खानावळी, फिरते खाद्य विक्री केंद्र, चहा टपरी व इतर खाद्यपदार्थ विक्रीची सर्व दुकाने बंद असून यामधील फक्त पार्सल व होम डिलिव्हरी सुरु आहे. सदर ठिकाणी भोजन, जेवण करण्यास सक्त मनाई आहे.
अत्यावश्यक सेवा सुरू असणार :
सर्व शासकीय व खाजगी दवाखाने, डिस्पेंसरी, क्लिनिक्स त्याचबरोबर, औषधालय, केमिस्ट शॉप, फार्मसी पुढील आदेशापर्यंत सुरूच राहणार आहे.
पेट्रोल पंप, पोस्ट ऑफिस, बँक, शासकीय कार्यालय काही अटींवर सुरू असणार आहे. यामध्ये, गर्दी नियंत्रण करण्यासाठी नागरिकांना व अभ्यागतांना प्रवेश करण्यास मनाई असेल, शासकीय पत्रव्यवहार फक्त इलेक्ट्रॉनिक माध्यमांद्वारे करण्यात येणार, शासकीय कर्मचाऱ्यांना दररोज न बोलावता आळीपाळीने (रोटेशन) कामावर बोलवण्यात येईल. तसेच, कृषी उत्पन्न बाजार समिती नियंत्रित स्वरुपात अटी व शर्तीवर पुढील आदेशापर्यंत सुरू आहेत.
या सेवा असणार पूर्णता बंद:
सर्व धार्मिक, राजकीय, सांस्कृतिक, सामाजिक कार्यक्रम, शासकीय मेळावे, सेमिनार, परिषदा, प्रदर्शने, मोर्चे, स्नेहसंमेलने, यात्रा, ऊरूस, जत्रा, उत्सव जेथे गर्दी होण्याची शक्यता आहे. अशी सर्व कार्यक्रम कायमस्वरूपी पुढील आदेशापर्यंत पूर्णता बंद असणार आहे.तसेच बसस्थानक,रेल्वे स्टेशन व इतर खाजगी वाहतुक सेवा बंद असणार आहे.
सर्व ग्रामीण व शहरी भागातील सरकारी, खाजगी, अनुदानित, विनाअनुदानित शाळा, महाविद्यालये, अंगणवाड्या, वाचनालये, अभ्यासिका, खाजगी शिकवणी वर्ग, तंत्रशिक्षण व उच्च शिक्षण संचालनालयाच्या अखत्यारीतील शैक्षणिक आस्थापना, आयुक्त व्यवसाय व प्रशिक्षण केंद्राच्या अखत्यारीतील शैक्षणिक आस्थापना कायमस्वरूपी पुढील आदेशापर्यंत पूर्णता बंद राहणार आहे.
सर्व सभागृहे, सिनेमागृहे, नाट्यगृहे, जलतरण तलाव, म्युझियम, व्यायामशाळा, पानठेला व खर्रा विक्री केंद्र, कॅरम क्लब हे कायमस्वरूपी पुढील आदेशापर्यंत पूर्णता बंद असणार आहे.
पर्यटन स्थळे, ताडोबा-अंधारी व्याघ्रप्रकल्प, आनंदवन, सर्व आधार केंद्र, सेतू केंद्र, आठवडी बाजार पुढील आदेशापर्यंत पूर्णता बंद असणार आहे. तर, औद्योगिक आस्थापना मधील अत्यावश्यक प्रक्रिया सोडून सर्व प्रक्रियेस मनाई पुढील आदेशापर्यंत करण्यात आली आहे.
