🔴 कोरपणातील कृषी सहाय्यक ACBच्या जाळ्यात
🔴 बंधाऱ्याच्या बिलासाठी ४० हजारांची लाच
🔴 वर्धा पथकाची रंगेहात कारवाई
चंद्रपूर, दि. २७ ऑक्टोबर २०२६ : बंधाऱ्याच्या कामाचे प्रलंबित बिल मंजूर करून देण्यासाठी ५५ हजार रुपयांच्या लाचेची मागणी करून तडजोडीअंती ४० हजार रुपये स्वीकारणाऱ्या कोरपणा येथील कृषी सहाय्यकाला लाचलुचपत प्रतिबंधक विभागाच्या (ACB) वर्धा पथकाने रंगेहात पकडले. हरी विठ्ठलराव उदगीरे (वय ३५) असे ताब्यात घेण्यात आलेल्या कृषी सहाय्यकाचे नाव आहे. या कारवाईमुळे कृषी विभागातील लाचखोरीच्या प्रकारावर पुन्हा एकदा प्रश्नचिन्ह निर्माण झाले आहे.
🔴 बिल मंजुरीसाठी मागितली ५५ हजारांची लाच
प्राप्त माहितीनुसार, तक्रारदाराने केलेल्या बंधाऱ्याच्या कामाचे प्रलंबित बिल मंजूर करून देण्यासाठी आरोपी कृषी सहाय्यक हरी उदगीरे याने सुरुवातीला ५५ हजार रुपयांची लाच मागितल्याचा आरोप आहे. त्यानंतर तडजोडीअंती ४० हजार रुपये स्वीकारण्याचे आणि उर्वरित रक्कम नंतर घेण्याचे ठरले.
या प्रकाराला कंटाळून तक्रारदाराने लाचलुचपत प्रतिबंधक विभागाकडे तक्रार दाखल केली. तक्रारीच्या आधारे एसीबी पथकाने २७ ऑक्टोबर रोजी शासकीय पंचांच्या उपस्थितीत लाच मागणीची पडताळणी केली. या पडताळणीत लाचेची मागणी झाल्याचे निष्पन्न झाल्यानंतर पथकाने सापळा रचला.
🔴 ५०० रुपयांच्या ८० नोटा स्वीकारताना पकडले
ठरल्याप्रमाणे ४० हजार रुपयांची लाचेची रक्कम स्वीकारताना एसीबीच्या पथकाने आरोपीला सायंकाळी ५ वाजून ५५ मिनिटांनी रंगेहात पकडले. लाचेची रक्कम ५०० रुपयांच्या ८० नोटांच्या स्वरूपात असल्याची माहिती आहे.
या कारवाईनंतर आरोपीच्या अंगझडतीमध्ये विव्हो कंपनीचा मोबाईल फोन आणि ५९५ रुपये रोख रक्कम हस्तगत करण्यात आली. आरोपीच्या निवासस्थानी झडती घेण्याची प्रक्रिया सुरू असल्याची माहिती देण्यात आली आहे.
🔴 गडचांदूर पोलीस ठाण्यात गुन्हा दाखल करण्याची प्रक्रिया
हरी विठ्ठलराव उदगीरे हे तालुका कृषी अधिकारी कार्यालय, कोरपणा येथे कृषी सहाय्यक म्हणून कार्यरत आहेत. त्यांचे सध्याचे वास्तव्य गडचांदूर येथील शिक्षक कॉलनीत असून ते मूळचे लातूर जिल्ह्यातील चाकूर तालुक्यातील हनुमंत जवळगा येथील रहिवासी आहेत.
या प्रकरणी गडचांदूर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू असल्याची माहिती आहे. पुढील तपास लाचलुचपत प्रतिबंधक विभाग, चंद्रपूर येथील पोलीस निरीक्षक श्री. केदार करीत आहेत.
🔴 वर्धा एसीबी पथकाची कारवाई
ही सापळा कारवाई पोलीस निरीक्षक संदीप मुपडे यांच्या नेतृत्वाखाली करण्यात आली. या पथकात पोलीस हवालदार मंगेश झामरे, सचिन गाडवे तसेच पोलीस शिपाई प्रीतम इंगळे, लक्ष्मण केंद्रे आणि विष्णू काळुसे यांचा सहभाग होता. सर्व अधिकारी व कर्मचारी लाचलुचपत प्रतिबंधक विभागाच्या वर्धा घटकाशी संबंधित आहेत.
🔴 लाचेची मागणी झाल्यास एसीबीकडे तक्रार करा
शासकीय काम करून देण्यासाठी कोणताही अधिकारी किंवा कर्मचारी लाचेची मागणी करीत असल्यास नागरिकांनी घाबरून न जाता लाचलुचपत प्रतिबंधक विभागाशी संपर्क साधावा, असे आवाहन करण्यात येते. शासकीय कामांसाठी लाच देण्याची वेळ येऊ नये आणि भ्रष्टाचाराला आळा बसावा, यासाठी नागरिकांनी पुढे येऊन तक्रार नोंदविणे महत्त्वाचे आहे.
Agricultural assistant in Korpana caught in ACB, bribe of Rs 40 thousand for dam bill, Wardha team catches him red-handed
#AgriculturalassistantinKorpanacaughtinACbbribeofRs40thousandfordabill #Wardhateamcatcheshimred-handed
#acb
#acbwardha #acbchandrapur
